Атырау облысында жүкті әйелді күйеуі ұрып-соққан: зардап шегуші жазалауды талап етеді

Сурет: newtimes.kz

Атырау облысында 32 жастағы жүкті әйел өзін аяусыз ұрып-соққан күйеуін жауапқа тартуды талап етіп отыр. Зардап шеккен әйел үйінен қашуға мәжбүр болған. Қазір ол Индер аудандық ауруханасында ем алуда, деп хабарлайды Qazaqtoday.info сайты.

Зардап шеккен әйел — Ақбөбек Оразбаева. Оның айтуынша, оқиға түнде болған: үйге келген күйеуі оны жұдырықпен басынан ұрған. Зорлық-зомбылық балалардың көз алдында болған — кіші қызы анасының айқайынан оянса, үлкендері қорқып, ұйықтап жатқан болып көрінген.

«Мен жатқан жерімде ол келіп, жұдырықпен ұрды. Шамасы, екі рет ұрды. Басым, құлағым — бәрі шыңылдап кетті. Мен «Алла, Алла» деп, жайманы алып жатқанда, кіші қызым оянды. Сөйтсем, екі балам да ұйықтамапты. Олар қорқып, ұйықтаған болып жатқан екен. Мен оның мені аямайтынын түсіндім», — деді зардап шеккен әйел.

Ол күйеуінің бұған дейін де қол көтергенін, алайда отбасын және үш ортақ баласын сақтап қалу үшін кешіргенін айтты. Соңғы оқиғадан кейін ол полицияға арызданғанымен, агрессорды бірден босатқан. Зардап шеккен әйел дауыс көтеріп, қайта қамауға алуға мәжбүр болған. Құқық қорғау органдары оқиғаға түсініктеме бермей, мән-жайды анықтап жатқандарын айтты.

Дәрігерлер әйелге тыныштықты ұсынып отыр. «Ол түскен кезде басы мен жақ сүйегінде көптеген жарақаттар болды, сол жақ аяғында көгерулер бар. Сонымен қатар ішінің ауырғанына шағымданды. Қазір хирургия бөлімінде ем алуда. Жағдайы тұрақты», — деді Индер аудандық ауруханасының хирургі Асланбек Ермұханов.

Еске салайық, бұған дейін Жамбыл облысы Мерке ауданында 19 жастағы Мадина Рашидқызының денесі табылған еді. Қайтыс болардан бірнеше сағат бұрын қыз күйеуінен кету үшін заттарын жинап, өзі мен сегіз айлық ұлына бөлме жалдау үшін досынан 15 мың теңге сұраған. Оны асылып қалған күйінде тапқан.