ҚазҰУ ғалымдары қазақ тіліне арналған ірі тілдік модельдер жобасын аяқтауда
Әл-Фараби атындағы ҚазҰУ ғалымдары қазақ тіліне арналған ірі тілдік модельдер жобасын аяқтауға жақын. Жоба 2024 жылы басталып, биыл аяқталады.
Сурет: egemen.kz
Әл-Фараби атындағы Қазақ ұлттық университетінің ғалымдары қазақ тілінің технологиялық дамуына арналған ірі тілдік модельдер жобасын аяқтауға жақын. 2024 жылы басталған бұл ғылыми жоба биыл толық аяқталады, деп хабарлайды Qazaqtoday.info сайты.
Жоба аясында қазақ тіліндегі мол мәтіндік деректер жинақталып, тазартылып, құрылымдалды. Осы деректер негізінде қазақ тіліне басымдық беріліп оқытылған бірнеше ірі тілдік модель әзірленді.
Әзірленген модельдердің маңызды техникалық ерекшеліктерінің бірі – tool calling мүмкіндігі. Бұл модельдерге сыртқы цифрлық құралдармен әрекеттесуге және күрделі тапсырмаларды бірнеше кезеңмен орындауға мүмкіндік береді. Аталған мүмкіндік көп агентті және автономды жүйелерді дамыту үшін маңызды.
