Белгілі қаламгер Бекжан Әшірбаев дүниеден өтті
Қазақ журналистикасы мен әдебиетіне үлес қосқан ақын, сазгер, ұстаз Бекжан Әшірбаев дүниеден өтті. Оның өмір жолы мен шығармашылығы туралы деректер.
Сурет: kznews.kz
Қазақ журналистикасы мен әдебиетінің, айтыс өнері мен ұлттық музыканың дамуына елеулі үлес қосқан танымал тұлға — ақын, сазгер, журналист әрі ұстаз Бекжан Төребекұлы Әшірбаев өмірден озды, деп хабарлайды Qazaqtoday.info сайты.
Бекжан Әшірбаев 1974 жылы Мақтаарал ауданында дүниеге келген. Ол 1996 жылы Әл-Фараби атындағы Қазақ ұлттық университетінің журналистика факультетін бітірген. Кейін ұзақ жылдар бойы осы университетте болашақ журналистерге дәріс оқып, еңбегін ұстаздық қызметпен ұштастырды.
Әр жылдары «Қазақ университеті», «Ел мен жер», «Заң» газеттерінде бас редактор болып, «Қазақ әдебиеті» мен «Жас қазақ үні» басылымдарында да жауапты қызметтер атқарды. Осы уақыт ішінде ол баспасөз саласында өз қолтаңбасын қалыптастырып, кәсіби журналистиканың дамуына зор үлес қосты.
Бекжан Әшірбаевтың шығармашылық жолы тек журналистикамен шектелген жоқ. Ол 1989 жылдан бастап республикалық ақындар айтыстарына қатысып, суырып салмалық өнерде өзіндік өрнегімен танылды. Сонымен қатар сазгер ретінде де есімі белгілі болды — ол «Көршінің қызы» сынды көпшілікке танымал әндердің авторы.
Қаламгердің әдеби шығармашылығы да оқырман назарынан тыс қалмады. 2025 жылы оған Қазақстан Жазушылар одағының халықаралық «Алаш» әдеби сыйлығы берілді.
Марқұмның елге сіңірген еңбегі, шығармашылық мұрасы, журналистикаға, әдебиетке және айтыс өнеріне қосқан үлесі кейінгі ұрпақ үшін де баға жетпес қазына болып қала бермек.
kznews.kz ақпарат агенттігінің редакция ұжымы белгілі қаламгердің қайтыс болуына байланысты оның отбасы мен туған-туыстарына, әріптестері мен шәкірттеріне қайғырып көңіл айтады.
