«Қайрат» Чемпиондар лигасынан шығып, Еуропа лигасында жалғастырады

Сурет: turkystan.kz

Алматылық «Қайрат» УЕФА Чемпиондар лигасының 2026/27 маусымындағы іріктеу кезеңінде Болгарияның «Левски» клубынан екінші рет жеңіліп, турнирдегі жолын аяқтады. Енді Қазақстан чемпионы Еуропа лигасының плей-офф кезеңінде бақ сынайды, деп хабарлайды Qazaqtoday.info сайты.

Үшінші іріктеу кезеңінің қарымта ойыны бүгін, 11 тамызда, Түркістандағы «Түркістан Арена» стадионында өтті. Матч 0:1 есебімен «Левскидің» пайдасына аяқталды. Алғашқы кездесуде де Болгария клубы дәл осындай есеппен жеңіске жеткен еді. Сөйтіп, екі ойынның қорытындысы бойынша «Қайрат» 0:2 есебімен ұтылды.

Ойындағы жалғыз гол 13-минутта соғылды. «Левски» ойыншысы Рейналдо айып алаңының сыртынан дәл соққы жасап, қазақстандық команданың қақпасын дәл көздеді.

Алматылық клуб еурокубоктағы жолын Еуропа лигасының плей-офф кезеңінде жалғастырады. «Қайраттың» қарсыласы Грекияның ПАОК және Бельгияның «Андерлехт» клубтары арасындағы жұптың жеңімпазы болады. Алғашқы матчта «Андерлехт» сырт алаңда 1:0 есебімен жеңіске жеткен.

Егер «Қайрат» Еуропа лигасының плей-офф кезеңінен өте алмаса, онда клуб еурокубок маусымын Конференциялар лигасының негізгі кезеңінде жалғастырады.