Америкалық UFC жұлдызы Асу Алмабаевты жекпе-жекке шақырды

Қазақстандық UFC жауынгері Асу Алмабаевқа америкалық файтер Брэндон Ройвал жекпе-жек өткізуді ұсынды, деп хабарлайды Qazaqtoday.info сайты 1bol.kz-ке сілтеме жасап. 

UFC 329 турнирінде Лас-Вегаста өткен кездесуде Ұлыбритания өкілі Лонир Кавананы үшінші раундта тұншықтыру әдісімен жеңгеннен кейін Ройвал октагонда сұхбат беріп, қарсылас ретінде Алмабаевты атады.

«Мен — хаостың шеберімін. Әдемі төбелескенді қалар едім, бірақ менің стилім басқа. Мен үнемі айқасуға шығамын. Асу Алмабаев, кеттік! Сен өте мықтысың. Сенімен жұдырықтасқым келеді, өйткені сен керемет файтерсің», — деді Ройвал Джо Роганға.

Қазіргі таңда UFC-дің аса жеңіл салмақ дәрежесіндегі рейтингінде төртінші орында тұрған Ройвал осылайша қазақстандық спортшыны ресми түрде жекпе-жекке шақырды.

Еске салсақ, Асу Алмабаев соңғы кездесуін 27 маусым күні Бакуде өткен UFC Fight Night 280 турнирінде өткізіп, америкалық Чарльз Джонсонды үшінші раундта мерзімінен бұрын жеңген болатын. Бұл жеңісі үшін қазақстандық файтер UFC тарапынан 100 мың доллар көлеміндегі арнайы бонусқа ие болды.