KyzdarNet арқылы жеңгетайлық ұйымдастырған топқа сот үкімі шықты
Фото: СҚО ПД
Қазақстанда алғаш рет KyzdarNet сайты арқылы жеңгетайлықты ұйымдастыруға қатысы бар трансұлттық ұйымдасқан қылмыстық топтың ұйымдастырушысы мен мүшелеріне сот үкімі шықты. Бұл туралы Солтүстік Қазақстан облысы полиция департаментіне сілтеме жасаған Qazaq Today ақпарат порталы хабарлады.
Полицияның мәліметінше, соңғы жылдары тыйым салынған веб-ресурстың қызметіне қатысты жеңгетайлық дерегі бойынша бес қылмыстық іс сотқа жолданған. Осы істерді талдау барысында құқық қорғау органдары қылмыстық желінің жұмыс істеу тәсілін анықтап, ұйымдасқан топтың негізгі мүшелеріне шыққан.
Қылмыстық іс 2025 жылдың мамыр айында тіркелген. Тергеуге Солтүстік Қазақстан облысы полиция департаменті мен Қаржылық мониторинг агенттігінің қызметкерлерінен құралған ведомствоаралық жедел-тергеу тобы жұмылдырылды. Жұмыс Ішкі істер министрлігі мен Бас прокуратураның үйлестіруімен жүргізілді.
Тергеу барысында мамандар цифрлық іздерді зерттеп, криптовалюта арқылы жүргізілген қаржылық операциялар мен халықаралық серверлік инфрақұрылымды талдаған.
Полицияның мәліметіне сәйкес, өткен жылдың шілдесінде Астана қаласы және өзге өңірлерде жүргізілген арнайы операция кезінде алты күдікті ұсталған. Тергеу нұсқасы бойынша, олар Қазақстан аумағында интимдік қызмет көрсететін адамдардың жарнамасын жариялауды ұйымдастырып, сайттың жұмысын әкімшілендірген және криптовалюта арқылы қаржылық операцияларды жүргізген.
Сегіз айға созылған тергеуден кейін 2026 жылғы 19 маусымда Солтүстік Қазақстан облысының қылмыстық істер жөніндегі мамандандырылған ауданаралық соты ұйымдасқан қылмыстық топтың алты мүшесіне қатысты айыптау үкімін шығарды.
Сот шешімімен топтың ұйымдастырушысы 10 жылға бас бостандығынан айырылды. Ал бес негізгі мүшесінің әрқайсысы 8 жылға сотталды. Үкім әзірге заңды күшіне енген жоқ.
Полицияның хабарлауынша, қылмыстық топтың өзге де мүшелерін анықтау және олардың заңсыз әрекеттерін толық құжаттау бағытындағы жедел-іздестіру және тергеу шаралары жалғасып жатыр.
