Жол сапасы: Теміртау мен Боралдайда күзде салынған асфальт көктемде бүлінді
Қарағанды облысының Теміртау қаласы мен Алматы облысының Боралдай кентінде күзде жөнделген жолдар көктемде жарамсыз болып қалды. Тұрғындар жол сапасына шағымдануда.
Қарағанды және Алматы облыстарында жаңадан салынған жолдардың сапасына қатысты мәселе туындады. Теміртау қаласында күзде төселген асфальт пен Боралдай кентіндегі жаңа жол жабыны көктем шыға бүлініп, ойылған, деп хабарлайды Qazaqtoday.info сайты.
Теміртаудағы Құрылысшылар даңғылында жөндеу жұмыстары жаз бойы жүргізіліп, күзде аяқталған болатын. Алайда қыстан кейін асфальт жабыны, әсіресе кәріз құдықтарының айналасы үгітіліп, терең шұңқырлар пайда болған. Дәл осындай жағдай Алматы облысы Іле ауданына қарасты Боралдай кентінде де тіркеліп, жергілікті тұрғындардың наразылығын тудырды.
Тұрғындар мердігерлердің жұмысын сапасыз деп бағалап, жергілікті биліктен шұғыл шара қабылдауды талап етуде. Олардың айтуынша, бюджеттен қомақты қаржы бөлінген жолдардың бір маусымға шыдамауы мердігер компаниялар мен жұмысты қабылдап алған жауапты органдардың қызметіне қатысты сұрақтар тудырады. Әзірге Теміртау және Боралдай әкімдіктері бұл мәселеге қатысты ресми түсініктеме берген жоқ.
