Президент Қасым-Жомарт Тоқаев пен Түркия Президенті Режеп Тайип Ердоғанға екі елдің бірлесіп жүзеге асырып жатқан бірқатар маңызды инвестициялық жобасы таныстырылды. Бұл жобалар аясында Қазақстан экономикасына 920 миллион доллардан астам инвестиция тартылып, 3100-ден аса жаңа жұмыс орны ашылады деп күтілуде, деп хабарлайды Qazaqtoday.info сайты.
Атап айтқанда, Miryıldız компаниясы Абай облысында кен байыту комбинатын, İskefe Holding Алматыда желатин өндірісін, ал Orzax Group Түркістан облысында биологиялық белсенді қоспалар шығаратын зауытты іске қосуды жоспарлап отыр. Сондай-ақ S Sistem Lojistik компаниясы «Қазпоштамен» бірлесіп Ақтөбе әуежайында логистика орталығын салуда, ал Tiryaki Holding Астанада бидай мен асбұршақты терең өңдейтін кәсіпорын құрылысын бастады.
Премьер-министрдің орынбасары Серік Жұманғарин мемлекеттер басшыларына бүгінге дейін түрік компанияларының қатысуымен ел экономикасының түрлі саласында жалпы сомасы 4 миллиард долларға жуық 100-ге тарта инвестициялық жобаның жүзеге асырылғанын баяндады.
Қазіргі уақытта құны тағы 4 миллиард долларды құрайтын 50-ге жуық бірлескен жоба бойынша жұмыстар жалғасуда. Бұл Қазақстан мен Түркия арасындағы инвестициялық ынтымақтастықтың қарқынды дамып келе жатқанын айғақтайды.
