Режеп Тайып Ердоған мемлекеттік сапармен Астанаға келді

Сурет: aqorda.kz

Түркия Республикасының Президенті Режеп Тайып Ердоған Қазақстанға мемлекеттік сапармен келді. Мәртебелі мейманды елорда әуежайында Мемлекет басшысы Қасым-Жомарт Тоқаевтың өзі қарсы алды деп хабарлайды Qazaqtoday.info сайты.

Түркия басшысымен бірге жұбайы Әмине Ердоған да ілесіп келді. Салтанатты рәсімге Қазақстан тарапынан Премьер-министрдің бірінші орынбасары Роман Скляр және Сыртқы істер министрі Ермек Көшербаев қатысты. Мәртебелі мейманның құрметіне әуежайда Құрмет қарауылы сап түзеп, екі елдің туын ұстаған оқушылар қошемет көрсетті.

Сапар аясында екі ел басшылары Қазақстан мен Түркия арасындағы Жоғары деңгейдегі стратегиялық ынтымақтастық кеңесінің алтыншы отырысын өткізеді. Келіссөздер барысында екіжақты қарым-қатынастың қазіргі жай-күйі мен оны одан әрі дамыту перспективалары талқыланбақ.

Айта кетейік, 13-14 мамыр күндеріне жоспарланған сапардан кейін, 15 мамырда Түркістан қаласында Түркі мемлекеттері ұйымына мүше елдер басшыларының бейресми саммиті өтеді. Саммиттің негізгі тақырыбы – «Жасанды интеллект және цифрлық даму».