Ризабек Айтмұханның алдағы қарсыласы белгілі болды

Қазақстандық еркін күрес шебері Ризабек Айтмұхан америкалық Real American Freestyle (RAF) лигасындағы келесі қарсыласын білді. Бұл туралы QazaqToday.info ақпараттық порталы 1bol.kz-ке сілтеме хабарлайды.

RAF ұйымының хабарлауынша, қазақстандық балуан 13 маусым күні АҚШ-тың Миссури штатындағы Сент-Луис қаласында өтетін RAF 10 турнирінде белдеседі. Бұл жолы оның қарсыласы – америкалық спортшы әрі промоушендегі дебютант Хейден Зилльмер болмақ.

Айта кетейік, Ризабек Айтмұхан соңғы кездесуін өткен айда RAF 08 турнирінде өткізген еді. Ол Олимпиада чемпионы, атақты америкалық балуан Кайл Снайдермен күш сынасып, тартысты белдесуде 6:12 есебімен жеңіліп қалды. Қазақстандық спортшы алғашқы сәттерде 6:0 есебімен алда тұрғанымен, қарсыласы кейін камбэк жасап кеткен болатын.

Ризабек Айтмұхан – 2023 жылғы әлем чемпионы. Сонымен қатар Азия чемпионаттарының үш дүркін күміс жүлдегері саналады.