Гарвард зерттеуі: Жасанды интеллект дәрігерден дәлірек диагноз қойды

Гарвард Медицина мектебі жүргізген жаңа зерттеу жасанды интеллектінің (AI) медицинадағы әлеуетін айқындады. Зерттеу қорытындысы бойынша, OpenAI компаниясының o1 моделі жедел жәрдем бөлімінде алғашқы диагноз қоюда екі тәжірибелі дәрігерден де жоғары нәтиже көрсеткен, деп хабарлайды Qazaqtoday.info сайты.

Эксперимент 76 пациенттің нақты медициналық деректеріне негізделген. Алғашқы тексеру кезінде ақпараттың шектеулі болғанына қарамастан, жасанды интеллект моделі 67% жағдайда дұрыс немесе өте жақын диагноз қоя алған. Ал тәжірибелі дәрігерлердің көрсеткіші сәйкесінше 55% және 50% деңгейінде болды. Бұл AI-дың толық емес деректермен жұмыс істеу қабілетінің жоғары екенін аңғартады.

Дегенмен, зерттеу авторлары бұл технологияны клиникалық тәжірибеде қолдануға әлі ерте екенін және қосымша тексерулер қажеттігін ескертеді. Сондай-ақ сарапшылар зерттеуде AI-ды жедел жәрдем дәрігерлерімен емес, жұмыс ерекшелігі өзгеше ішкі аурулар мамандарымен салыстырудың кемшілік екенін атап өтті. Осыған қарамастан, бұл технологияның денсаулық сақтау саласының болашағына елеулі ықпал ететіні сөзсіз.