Шымкентте жол ортасы опырылып, жүргізушілерге қауіп төндіретін шұңқыр пайда болды
Шымкент қаласының Тұран ауданында жол ортасы опырылып, терең шұңқыр пайда болды. Қауіпті аймақ ірі жол апатына себеп болуы мүмкін деп тұрғындар дабыл қағуда.
Шымкент қаласындағы көшелердің бірінде асфальт опырылып, терең шұңқыр пайда болды. Тұран ауданында орын алған бұл жағдай көлік жүргізушілеріне айтарлықтай қауіп төндіріп, ірі жол апатына себеп болуы мүмкін деп хабарлайды Qazaqtoday.info сайты.
Әлеуметтік желіде тараған видеода жолдың қақ ортасы ойылып қалғаны анық көрінеді. Куәгерлердің айтуынша, шұңқырдың тереңдігі көліктер үшін өте қауіпті және кез келген уақытта қайғылы жағдайға ұласуы ықтимал. Тұрғындар бұл жағдайға қатты алаңдаушылық білдіріп отыр.
Видео авторы бұл мәселе бойынша жауапты органдарға бірнеше рет шағымданғанын, алайда ешқандай нәтиже болмағанын алға тартады. Оның сөзінше, қауіпті аумақ қоршалмаған және ешқандай ескерту белгісі қойылмаған. Соның салдарынан жүргізушілер апатты аймаққа дайындықсыз тап болуы мүмкін.
Бұл оқиға Шымкенттегі жолдардың сапасына қатысты мәселені қайта күн тәртібіне шығарды. Қала тұрғындары жергілікті биліктен жолды жөндеу жұмыстарын дереу бастап, көлік қозғалысының қауіпсіздігін қамтамасыз етуді талап етуде.
