«Нұрсұлтан Назарбаевтың білім беру қоры» Қазақстан-Британ техникалық университетінің (ҚБТУ) акционері атанды. Бұған дейін оқу орны «Қайтарылған активтерді басқару жөніндегі компанияға» тиесілі болған, деп хабарлайды Qazaqtoday ақпарат агенттігі.
Акционерлердің ауысқаны туралы ақпарат қаржылық есептілік депозитарийінің сайтында жарияланды. Университеттің жаңа иесі – NNEF қоғамдық қоры. Оның құрылтайшыларының бірі – Динара Құлыбаева.
Сонымен қатар, корпоративтік оқиғалар туралы басқа есепте ҚБТУ ғимаратының мемлекет меншігіне өтетіні хабарланды. Акционер шешімі бойынша, тарихи маңызы бар нысан мемлекетке сыйға тартылмақ.
«Алматы қаласы, Төле би көшесі, 59 мекенжайында орналасқан, 1957 жылы салынған, республикалық маңызы бар тарих және мәдениет ескерткіші саналатын «ҚБТУ» АҚ әкімшілік ғимараты сыйға тарту шартын жасасу және қабылдау-тапсыру актісіне қол қою арқылы мемлекетке берілсін. Жоғарыда аталған ғимаратқа сенімгерлік басқару шартын жасасуға бастамашылық етілсін», — делінген жарияланған құжатта.
Фото: Әлеуметтік желіден
