Фото: Pixabay
Финляндияда ер адам сүйікті мысығынан айырылғаннан кейін ауыр психологиялық күйзеліске түсіп, уақытша еңбекке жарамсыздық парағын алған. Алайда жұмыс беруші бұл жағдайды дәлелді себеп ретінде қабылдамай, дау сотқа дейін жеткен. Бұл туралы жергілікті Iltalehti басылымы жазды, деп хабарлайды Qazaqtoday.info ақпарат порталы.
Мысыққа эвтаназия жасауға мәжбүр болған ер адам сол кезеңде жұмысқа шыға алмаған. Соған қарамастан, жұмыс беруші еңбекке жарамсыздық парағы бар екеніне қарамастан, қызметкерден жұмыс орнына қайта келуін талап еткен. Қызметінен айырылып қалудан қауіптенген ер адам бұл талапқа уақытша келісуге мәжбүр болған.
Алайда көп ұзамай жұмыс беруші оған өз еркімен жұмыстан кету немесе мәжбүрлі түрде жұмыстан босатылу арасынан таңдау ұсынады. Нәтижесінде еңбек қатынасы тоқтатылып, іс Тампере қаласындағы сотта қаралған.
Сот қызметкердің пайдасына шешім шығарып, жұмыстан босатуды заңсыз деп таныды. Үкімге сәйкес, компания бұрынғы қызметкеріне 40 мың еуродан астам өтемақы төлеуге міндеттелді. Бұл сомаға моральдық өтемақы мен уақытша еңбекке жарамсыздық парағы бойынша төлемдер де кіреді.
Алайда сот шешімі шыққанға дейін ер адам қайтыс болып кеткен. Енді тағайындалған қаражат оның мұрагерлеріне төленетін болады.
