Өскеменде 30 градус аязда бірден екі су құбыры жарылып, екі мыңнан астам тұрғын ауыз сусыз отыр, деп хабарлайды Qazaqtoday ақпарат агенттігі.
18 қаңтар күні таңертең Мирный кентіндегі Беспалов көшесі мен Карбышев, 28 мекенжайында орналасқан су құбырларында апат тіркелген.
«Өскемен Водоканал» кәсіпорнының мәліметінше, жөндеу жұмыстарына байланысты сағат 10:30-дан бастап алты көпқабатты үй (932 тұрғын), 805 жеке үй (1338 тұрғын) және №26 мектеп судан ажыратылды.
«Қазір барлық қызметкер апат орнында жұмыс істеп жатыр. Қалпына келтіру шаралары жүргізілуде. Жүйенің біртұтас болуына байланысты жақын маңдағы кейбір үйлердің жоғарғы қабаттарында су қысымы төмендеді», — деп хабарлады компания өкілдері.
Қала тұрғындары үшін су таситын көліктер ұйымдастырылған. Тапсырыс беру үшін тәулік бойы жұмыс істейтін 531661, 87052067916 нөмірлеріне хабарласуға болады.
Фото: Әлеуметтік желіден
