Алматыда ер адам интим қызмет көрсететін бойжеткеннен шабуыл көрдім деп шағымданды
Алматының Медеу ауданында ер адам интим қызмет көрсететін бойжеткен өзіне шабуыл жасады деп шағымданды. Полиция екі тарапты да аудандық басқармаға жеткізді.
Сурет: ernur.kz
Алматыда ер адам интим қызмет көрсететін бойжеткен өзіне шабуыл жасады деп шағымданды. Оқиға Медеу ауданында болған.
Бұл туралы Qazaqtoday.info сайты хабарлайды.
Полицияның 102 нөміріне Қонаев көшесіндегі пәтерлердің бірінде жанжал шыққаны туралы хабар түскен. Оқиға орнына «Буран-636» патрульдік полиция экипажы жеткен.
Ер адамның айтуынша, бойжеткен оның басынан ағаш затпен ұрған. Кейін ол қыздың соңынан қуған. Полицейлер күдікке ілінген бойжеткенді Мәметова көшесі мен Назарбаев даңғылының қиылысында ұстады.
Ал бойжеткен оқиғаның басқаша өрбігенін айтты. Оның сөзінше, ер адам көшеде өзіне тиісіп, мазасын алған. Сондықтан ол өзін қорғау үшін ер адамды ұрғанын жеткізген.
Екеуі де Медеу аудандық полиция басқармасына жеткізілді. Қазір оқиғаның неден шыққаны мен мән-жайы анықталып жатыр.
