Қаза тапқандар бар: Ыстанбұлда алапат су тасқыны болды

Түркияның Ыстанбұл қаласында толассыз жауған нөсерден кейін су тасқыны басталды. Қатты ағын көшелерді басып, кейбір көліктерді ағызып әкеткен. Табиғи апат салдарынан бір жасөспірім көз жұмды, деп хабарлайды Qazaqtoday.info ақпарат порталы. 

Нөсер жаңбыр қала инфрақұрылымына да айтарлықтай әсер етті. Жолдар, жерасты өткелдері мен туннельдерді су басып, көлік қозғалысы қиындаған. Кейбір тұрғын үйлер мен кәсіпорындарға да су кірген. Қауіпсіздік мақсатында Ыстанбұлдағы барлық мектеп уақытша жабылды.

Ыстанбұл губернаторы Давут Гүл тұрғындарға алдағы уақытта жауын-шашынның күшеюі мүмкін екенін ескертіп, сақтық шараларын қатаң ұстануға шақырды.

«Құрметті отандастар! Бүгін түнде облыстың барлық аумағында, ал ертең Анадолы бөлігінде жауын-шашын күшейеді деген болжам бар. Жаңбыр кезінде сақтық шараларын сақтауды сұраймыз. Мүмкіндігінше далаға шықпаңыздар және жеке көлікпен жолға шықпаңыздар», – деді ол 14 қазанда.

Губернатор сондай-ақ тұрғындарға жертөлелер мен су басу қаупі жоғары аумақтарға бармауға кеңес берді. Бұдан бөлек, шалшық сулардан, өзен арналары мен су басқан жерасты өткелдерінен аулақ болуды сұрады. Көшкін қаупі бар аймақтар мен ондағы ғимараттарға жақындамау жөнінде де ескерту жасалды.

Су тасқыны кезінде 14 жастағы жасөспірім қаза тапты. Мәліметке қарағанда, ол су басқан аумақта жүрген кезде электр тогының соққысына ұшыраған.

Жасөспірім ес-түссіз күйде ауруханаға жеткізілген. Алайда дәрігерлердің барлық әрекетіне қарамастан, оның өмірін сақтап қалу мүмкін болмаған.