Ақмола облысында итті балтамен өлтірген ер адамға 100 сағат қоғамдық жұмыс тағайындалды
Ақмола облысында әйелін ит қауып алғаннан кейін жануарды балтамен өлтірген ер адам сотталып, 100 сағат қоғамдық жұмысқа тартылды.
Фото: freepik
Ақмола облысында әйелін ит қауып алғаннан кейін жануарды балтамен ұрып өлтірген ер адам сот алдында жауап берді.
Бұл туралы Qazaqtoday.info сайты хабарлайды.
Сот материалдарына сәйкес, оқиға Жақсы ауданында болған. Жергілікті тұрғынның әйелін оның танысының иті тістеп алған. Бұл туралы білген ер адам ашуға беріліп, ит иесінің үйіне барған.
Сол жерде ол жануарды балтамен ұрған. Ит алған жарақатынан өліп қалған.
Сот отырысында айыпталушы кінәсін толық мойындап, жасаған әрекетіне өкінетінін жеткізген.
Істі қараған сот ер адамды кінәлі деп танып, 100 сағат қоғамдық жұмысқа тарту жазасын тағайындады.
Оқиға қоғамдағы жануарларға қатыгездік таныту мәселесін тағы бір мәрте күн тәртібіне шығарды. Мамандар қандай жағдай болмасын, жануарға күш қолданудың орнына полицияға немесе тиісті органдарға жүгіну қажет екенін еске салады.
