Леңгірде тұрғын үйге жылан кіріп кетті: тұрғындар қауіпсіздігіне кім жауап береді?

Фото: видеодан скрин

Түркістан облысының Леңгір қаласында жеке тұрғын үйге жылан кіріп, үй иелері құтқарушыларды шақыруға мәжбүр болды, деп хабарлайды Qazaqtoday.info ақпарат порталы.

Оқиға орнына жеткен ТЖМ қызметкерлері арнайы құралдың көмегімен жыланды қауіпсіз ұстап, үйден алып шыққан, зардап шеккендер жоқ. Алайда тұрғын үйдің ішіне дейін жыланның кіріп кетуі елді мекен аумағындағы шөп шабу, қоқыс пен қараусыз жатқан аумақтарды тазалау мәселесіне тағы назар аудартады. Жергілікті әкімдік әсіресе күн ысыған кезде бауырымен жорғалаушылар шығуы мүмкін аумақтарды уақытылы тазалап, тұрғындарға қауіп төндіретін орындарды бақылауда ұстауы керек. ТЖМ жылан көрген жағдайда оған жақындамауға, өз бетімен ұстауға немесе қуып шығаруға әрекет жасамауға шақырды. Мұндай жағдайда тұрғындар дереу 112 нөміріне хабарласуы қажет.

Видео: ҚР ТЖМ