Қазақстан Президенті Қасым-Жомарт Тоқаев Air Astana компаниясының бас атқарушы директоры Ибрагим Жанлыелді қабылдады, деп хабарлайды Qazaqtoday.info сайты.
Кездесу барысында Мемлекет басшысына авиакомпанияның қаржылық және операциялық көрсеткіштері туралы есеп берілді. Air Astana Орталық Азия мен Кавказ аймағында жетекші орын алады.
Президентке 2026-2027 жылдары әуе паркін Boeing 787 Dreamliner жаңа буын ұшақтарымен толықтыру жоспары баяндалды. Қазіргі уақытта компания Airbus A320neo және A321neo маркалы 50 ұшаққа, сондай-ақ Boeing 787-9 маркалы 15 әуе кемесіне тапсырыс берген. Барлық ұшақтар 2036 жылға дейін жеткізіледі.
Ибрагим Жанлыел Президентке компанияның ұзақмерзімді даму стратегиясын таныстырды. Құжат Қазақстанның өңірлік авиациялық хаб ретіндегі орнын нығайтуға және халықаралық деңгейде қызмет көрсетуді кеңейтуге бағытталған. Air Astana бағыттар санын көбейту, мультимодальді тасымалды дамыту және ұшу жиілігін арттыруды жоспарлап отыр. Цифрландыру мен жаңа технологияларды енгізуге ерекше көңіл бөлінеді.
Қасым-Жомарт Тоқаев әуе паркін толықтыру, бағыттар желісін кеңейту және тасымалдау әлеуетін нығайту сияқты стратегиялық мақсаттарды тиімді іске асырудың маңызын атап өтті. Президент АҚШ және Жапониямен тікелей әуе қатынасын ұйымдастыруды басымдық ретінде белгіледі.
Мемлекет басшысы рейстердің кешігуі, борттың ауысуы сияқты жолаушылар жиі сынайтын мәселелерге назар аударып, қазақстандықтар көп саяхаттайтын елдермен әуе тасымалын дамытуға шақырды.
