Сәрсемәлиев ісі: сотта айыпталушының ломбардқа барған видеосы көрсетілді
Атырауда төрт адамды өлтірді деп айыпталған Сұлтан Сәрсемәлиевтің соты жалғасуда. Сот отырысында оның ломбардқа алтын тапсырған сәтінің видеосы көрсетілді.
Сурет: ult.kz
Атырау облысында бұрынғы әйелінің төрт туысын өлтірді деп айыпталған Сұлтан Сәрсемәлиевке қатысты резонансты қылмыстық іс бойынша сот процесі жалғасып жатыр. Кезекті отырыста айыпталушының ломбардқа алтын бұйымдарды өткізген сәті түсірілген бейнежазба көрсетілді, деп хабарлайды Qazaqtoday.info сайты.
Сот барысында С. Сәрсемәлиев кейбір айыптар бойынша кінәсін ішінара мойындап, алайда бірқатар эпизодтармен келіспейтінін білдірді. Атап айтқанда, айыпталушы бір адамның өлімі қасақана емес, абайсызда болғанын алға тартты.
Тергеу материалдарына сәйкес, психологиялық-психиатриялық сараптама Сәрсемәлиевтің қылмыс жасау кезінде есі дұрыс болғанын анықтаған. Сонымен қатар, тергеу бұл іске басқа адамдардың қатысы барын растамады.
Қазіргі уақытта Атырау облысының мамандандырылған ауданаралық қылмыстық істер жөніндегі сотында отырыстар жалғасып, іс материалдары мен дәлелдемелерді зерттеу кезең-кезеңімен жүргізілуде.
