Экономика саласы бойынша Нобель сыйлығының лауреаты Дарон Аджемоглу жасанды интеллект (AI) жаппай жұмыссыздыққа әкеледі деген болжамдарға күмәнмен қарайды. Оның пікірінше, бұл технология өнімділікті арттыруға тек шектеулі үлес қосады және адам еңбегін толықтай алмастыра алмайды. Ғалым қазіргі AI жүйелері адамның тұтас жұмысын емес, оның жекелеген тапсырмаларын орындайтын құрал ғана екенін алға тартады деп хабарлайды Qazaqtoday.info сайты.
Сонымен қатар экономист OpenAI, Google DeepMind және Anthropic секілді ірі технологиялық компаниялардың беделді экономистерді жаппай жұмысқа тартуына алаңдаушылық білдірді. Аджемоглу мұны корпорациялардың жасанды интеллектке қатысты қоғамдық пікірді өз мүддесіне қарай қалыптастыру әрекеті деп санайды. Ол осындай жағдайда мамандардың объективті ғылыми зерттеу жүргізе алатынына күмән келтіреді.
Аджемоглу атап өткен үшінші маңызды фактор – технологияның қарапайым қолданушы үшін ыңғайлылығы. Оның сөзінше, бұрынғы технологиялық төңкерістерге себеп болған PowerPoint немесе Word сияқты бағдарламалар кез келген адамға түсінікті болған. Ал қазіргі жасанды интеллектке негізделген құралдардың көпшілігі әлі мұндай қарапайымдылық деңгейіне жете қойған жоқ, бұл олардың кеңінен таралуына кедергі келтіруі мүмкін.
