Ақылы емес, азапты жол: Арал мен Қазалы арасындағы жол жүргізушілердің сынына ілікті
Фото: видеодан скрин
Арал мен Қазалы арасындағы тасжолдың сиқы жолаушылардың ашу-ызасын туғызып отыр. Халық «ақылы» деп ақша төлеп жүрген жолдың қазіргі жағдайы сын көтермейді. Желіде тараған бейнежазбалардан көліктің емес, түйенің жүруіне қолайлы соқпақты көруге болады.
Жүргізушілер «Қазавтожолдың» бұл әрекетін халықтың қалтасын қағу деп бағалауда. Сапасыз жол көліктердің тозуына ғана емес, жол апаттарының жиілеуіне де себеп болып отыр. Жауапты мекеме ақша жинауға келгенде алдына жан салмайды, ал жөндеуге келгенде сылтау таусылмайды. Салық пен ақыны уақытылы төлеп отырған халық лайықты сервисті талап етуге құқылы.
Бұл жолдың мәселесі қашан шешілері әзірге белгісіз. Құзырлы органдар бұл жағдайға назар аударып, нақты шара қолдануы тиіс. Әзірге жолаушыларға тек шыдамдылық тілеуден басқа амал жоқ.
