Екібастұзда жолды қазып кетіп, әкімдік қайта қалпына келтірмеген

Фото: видеодан скрин

Екібастұз қаласында Беркімбаев көшесінің тұрғындары жол мәселесіне байланысты шағымын айтып отыр. Жергілікті халықтың сөзінше, жерасты жұмыстары жүргізілгеннен кейін жол қайта жөнделмей, көшенің бәрі батпаққа айналған. Қар еріген соң көшемен жүру тіпті қиындап, көліктер жиі батып қалатын болған. Тұрғындар үйге кіріп-шығудың өзі мұңға айналғанын айтады. Кейбірі көлігін алысырақ жерге қалдырып, балшық кешіп жүруге мәжбүр.

Жүргізушілер күн сайын көліктің астыңғы бөлігін тексеріп, сынбасын деп қорқып жүргенін айтады. Осындай жағдай ұзақ уақыттан бері өзгермегеніне тұрғындар наразы. Айтуларынша, тиісті мекемелер қазу жұмыстарын жасағанымен, жолды бұрынғы қалпына келтіруге асықпаған. Қала әкімдігі бұл көшедегі жағдайға қатысты нақты түсініктеме бермеген.

Тұрғындар мәселе қашан шешілетінін сұрап отыр.