Семейде сорақы жол шаршатты: әкімдіктің құр уәдесінен халық әлі азап шегіп жүр

Семей қаласында жол мәселесі тағы да тұрғындардың наразылығын туғызды. Қаладағы Кирпичный ауданында, Жоламан бағытына өтетін теміржол өткелі маңындағы жолдың жағдайы әбден нашарлаған. Бұл туралы QazaqToday.info ақпараттық порталы хабарлайды.

Жүргізушілердің айтуынша, жолдың бүлінгені сонша, кей көліктердің подвескасы сынып, жүргізушілер айналып өтуге мәжбүр. Соның салдарынан кептеліс пайда болып, адамдар жұмысқа кешігетін жағдайлар жиілеген. Бұл учаскеде жүру күн сайын қиындап бара жатқанын тұрғындар ашық айтып отыр.

Тұрғындардың сөзінше, бұл мәселе жаңа емес. Бұған дейін әкімдік өкілдері шұңқырларды уақытша жауып, жолды ретке келтіреміз деп уәде берген. Алайда арада уақыт өтсе де, жолдың жағдайы өзгермеген.

Қала тұрғындары негізгі жолдардың өзі осындай күйде қалса, қауіпсіздік туралы сөз қозғаудың өзі қиын екенін айтады. Олар әкімдіктен нақты жөндеу жұмыстарының қашан басталатынын түсіндіруді талап етіп отыр.

Жол мәселесінің ұзақ уақыт шешілмеуі бюджет қаражаты қайда жұмсалып жатыр деген сұрақты да күшейтіп отыр.