Алматылық әйел арбаға баласын салып алып курьер болып жүр
Фото: видеодан скрин
Алматы қаласында баласын арбаға отырғызып, жаяу курьер болып жұмыс істеп жүрген ананың видеосы әлеуметтік желіде кең тарап, қызу талқыға түсті. Бұл туралы QazaqToday.info ақпараттық порталы хабарлайды.
Кадрларда әйелдің бір қолымен баласы отырған арбаны итеріп, екінші жағында тапсырыстар салынған термосөмкені арқалап бара жатқаны байқалады. Қыс мезгіліне қарамастан, ана күнкөріс қамымен көшеде еңбек етіп жүргені көпшіліктің жүрегін елжіретті. Видео авторы бұл көріністің өзін қатты әсерлендіргенін айтып, ананың табандылығы мен адал еңбегін ерекше атап өткен.
Оның айтуынша, әйел жеңіл жол іздемей, маңдай терімен бала-шағасын асырап жүр. Желі қолданушыларының бірі ананың қайсарлығына тәнті болса, енді бірі мұндай жағдайға жеткізген әлеуметтік мәселелерді көтерді.
